Махсус имкониятлар
Янги ўқув йили бошланиш арафасида таълим муассасаларида ўқувчилар овқатланишини ташкил этиш масаласи кун тартибига чиқади. Бу жараёнда амал қилиш керак бўлган санитария қоидалари, нормалари ва гигиена талаблари ҳақида маълумот бериб боришга қарор қилдик.
“Умумий ўрта, ўрта махсус, профессионал таълим масканларида ўқувчилар овқатланишини ташкил этишнинг санитария қоидалари, нормалари ва гигиена нормативлари”га кўра, таълим муассасаларида овқатланишни ташкил этишда озиқ-овқат маҳсулотларини сақлаш учун мўлжалланган ҳамда хавфсизлик талабларига жавоб берадиган чинни, фаянс ва шиша идишлар(тарелка, коса, пиёла, чашка, бокаллар)дан фойдаланиш лозим.
Таомларни пишириш ва сақлаш учун ошхона ускуналари идишлари (қошиқ, вилка, пичоқлар) зангламайдиган пўлат ёки гигиеник хусусиятларига кўра шунга ўхшаш материаллардан тайёрланган бўлиши керак. Алюминийдан тайёрланган ошхона жиҳозларидан фойдаланиш тақиқланади.
Овқатланиш рациони сутка давомида ёки сутканинг маълум бир вақтида болалар овқатланишига мўлжалланган маҳсулотлар таркибини шакллантиришни кўзда тутади.
Таомлар рўйхатини тақсимлаш, пазандалик, ун, қандолат ва нон маҳсулотлари билан алоҳида таомланишни (нонушта, тушлик, иккинчи тушлик, кечки овқат) ўз ичига олган таомнома тузилиши шу рационга асосланиши лозим.
Таълим муассасасининг барча ўқувчиларини соғлом овқатланиш билан таъминлаш учун 10 кундан кам бўлмаган муддатга ишлаб чиқилган,шунингдек, таомлар рецептураси бўйича маҳсулотларнинг рўйхати кўрсатилган меню-тартибига мувофиқ намунавий таомнома тузилиши мумкин.
Намунавий таомнома йил мавсумини, ўқувчилар ёши, талаб қилинадиган кунлик таом қуввати, асосий озуқа моддаларининг зарурий миқдорини ҳисобга олиб шакллантирилади.
Уни тузишда ўқувчиларнинг овқатланишидаги миллий ўзига хосликлари, таълим муассасасида бўлиш вақти, ёши ва жисмоний юкламаси эътиборга олинади.
Таълим муассасалари ўқувчилари учун икки маҳал (нонушта ва тушлик) иссиқ овқат ташкил этилади. Куни узайтирилган гуруҳларда таҳсил олувчи болаларга қўшимча иккинчи тушлик уюштирилади.
Ҳар куни овқатланиш залига таълим муссасаси раҳбари билан келишилган ва ошхона раҳбари томонидан тасдиқланган таомнинг номи, миқдори кўрсатилган таомнома илиб қўйилиши зарур.
