Президент «Томорқа хўжалиги тўғрисида»ги қонунни имзолади

1 апрель куни Шавкат Мирзиёев «Томорқа хўжалиги тўғрисида»ги қонунни имзолади. 

Қонунга кўра, томорқа хўжалиги шахсий томорқа ер участкаларида қишлоқ хўжалиги маҳсулотларини ҳам эркин савдо учун, ҳам оила эҳтиёжлари учун етиштириш (қайта ишлаш) билан боғлиқ меҳнат фаолиятидир.

Шунингдек, ҳужжатда томорқа хўжалиги тадбиркорлик фаолияти ҳисобланмаслиги ва уни давлат рўйхатидан ўтказиш талаб этилмаслиги белгиланган. Томорқа хўжалигини юритиш учун ажратилган шахсий томорқа ер участкасида етиштирилган (қайта ишланган) қишлоқ хўжалиги маҳсулотлари хусусий мулк сифатида белгиланди.

Бундан ташқари, томорқа хўжалигидаги фаолият шахсий томорқа ер участкаси эгасининг ва оила аъзоларининг шахсий меҳнатига асосланиши қайд этилган. Майдони камида 0,04 гектар бўлган шахсий томорқа ер участкасида банд бўлган ёки мазкур майдонда шохли қорамол ёхуд камида 50 бош парранда боқаётган шахсий томорқа ер участкасининг эгаси ёки унинг оила аъзолари ижтимоий солиқ тўлаши мумкин.

Томорқа хўжаликларининг ҳисоби қандай юритилиши ҳам келтирилган бўлиб, фуқароларнинг ўзини ўзи бошқариш органлари томонидан томорқа хўжаликларини ҳисобга олиш реестрини шакллантириш орқали амалга оширилади.

Ушбу норма расмий эълон қилинган кундан эътиборан кучга киради.