Har bir davlatning taraqqiyoti va barqarorligi uning Asosiy qonuniga, ya’ni Konstitutsiyasiga bog‘liq. Konstitutsiya — bu davlatning mustaqilligi, xalqning huquq va erkinliklarini kafolatlovchi eng oliy hujjatdir.

O‘zbekiston Respublikasi Konstitutsiyasi 1992 yil 8 dekabr kuni qabul qilingan bo‘lib, bu sana xalqimizning tarixida ulug‘ bayram sifatida nishonlanadi. Ushbu kun Vatanimizda Konstitutsiya kuni deb belgilangan va har yili butun mamlakat bo‘ylab keng nishonlanadi.

Konstitutsiyamizda inson huquq va erkinliklari, fuqarolarning burchlari, davlat boshqaruvining asosiy prinsiplari hamda jamiyatning siyosiy, iqtisodiy va ma’naviy asoslari belgilab qo‘yilgan. Unda “Inson, uning hayoti, erkinligi, sha’ni va qadr-qimmati — oliy qadriyatdir” degan qoida asosiy g‘oya sifatida ifoda etilgan.

Konstitutsiya qabul qilinganidan so‘ng mamlakatimizda jamiyatning barcha sohalarida islohotlar amalga oshirildi. Xususan, fuqarolarning siyosiy faolligi oshdi, sud-huquq tizimi isloh qilindi, ta’lim va sog‘liqni saqlash sohalarida katta yutuqlarga erishildi.

Bugungi kunda ham Asosiy Qonunimiz zamon talablariga mos ravishda takomillashtirib borilmoqda. Yangi tahrirdagi Konstitutsiyada inson manfaati, erkinligi va adolat tamoyillari yanada mustahkamlandi.

Shu boisdan, har bir fuqaro Konstitutsiyaga hurmat bilan munosabatda bo‘lishi, uning normalariga rioya etishi va uni hayotga tatbiq etishga hissa qo‘shishi lozim.

8 dekabr — bu faqat bayram emas, balki Asosiy Qonunimizga sadoqat, Vatanga muhabbat va xalqimiz birdamligining ramzidir.

Urgut tuman hokimligi bosh yuriskonsulti

 M.Xurramov