Махсус имкониятлар
Хамдамова Мавлуда Норимовна
Меҳнат стажи 40 йил. Мазкур вазифада 2010 йилдан ишлаб келмоқда.
М.Хамдамова вилоятдаги энг фаол ва ибратли ҳунармандлардан бири.
Фаолияти давомида халқ амалий санъатининг муҳим йўналишларидан бири - каштачиликнинг азалий анаъаналарини қайта тиклаб, уни келгуси авлодга етказиш ва бу йўналишдаги тадбиркорлик фаолияти орқали хотин-қизларни барқарор иш ўринлари билан таъминлашда фидойилик билан меҳнат қилмоқда.
У каштадўзликни онаси Нарзи Нозимовадан ўрганиб, 1978 йилдан ишдан ташқари мустақил фаолият юритиб келган. Фаолиятини Ургут туманининг Ғўс қишлоғида бошлаган.
М.Хамдамова Ургут туманида биринчи бўлиб каштачилик соҳасини уй юмуши, аёллар эрмагидан амалий санъат ва касб даражасига олиб чиққан.
2010 йилда Самарқанд шаҳрининг Тошкент кўчасида каштачилик буюмлари билан савдо қилувчи савдо шахобчаси очган. Натижада, 18 нафар аёл доимий иш ва даромад манбаи билан таъминланган.
М.Хамдамова қадимий анъаналарни қайта тиклади.
ХХ асрда кашталар асосан фабрикада ишлаб чиқарилган матоларда, кимёвий бўёқлар билан рангланган иплар билан тикилган. М.Хамдамова Ургутнинг турли қишлоқ ва маҳаллаларини кезиб, каштачиликда азалдан ишлатилган нақш турларини чуқур ўрганган. Натижада, бадиий кашталарнинг “босма”, “йўрма” ва “чинни хаёл” услубларини ўзлаштириб, қўлда тўқилган бўз, адрас ва шойи газламаларда кашталар тикилишини йўлга қўйган. У ипларни бўяшда табиий ранглар ишлатилишини тадбиқ қилган.
М.Хамдамова анъанавий услубда деворга осиладиган йирик безак буюмлари: сўзана, палак, гулкўрпа тахмонга тўшаладиган пардалар, жойпўш, зардевор, бўғжома, рўйжолар, шунингдек ойнахалта, чойхалта, белбоғ, ёстиқчалар тўқишни йўлга қўйган.
У бутун меҳнат фаолиятини каштачилик маданий меросни сақлаш, қайта тиклаш, уни умумжаҳон маданий меросининг бир қисми сифатида дунёга машҳур қилишга бағишламоқда.
Уйидаги устахонасига ўзбек халқи амалий санъати шайдолари бўлган чет эллик сайёҳларни чорлаб, Ғўс қишлоғини вилоятдаги туризм масканларидан бирига айлантирган. Жумладан, 2015 йилда 19 нафар,
2016 йилда 31 нафар, 2017 йилда эса 53 нафар сайёҳ М.Ҳамидованинг устахонасига ташриф буюриб, миллий каштачилик санъатимиз билан яқиндан танишган.
М.Хамдамова ўзи қатнашган давра суҳбатлари, учрашувларда ҳунармандчиликнинг ривожи учун мамлакатимизда олиб борилаётган изчил ислоҳотлар, хусусан яратилган имконият ва имтиёзларни маҳалладошлари ва шогирдларига кенг тарғиб қилмоқда.
Шунингдек, 2015 йилда XIV анънавий “Ипак ва зираворлар” кўргазмасида, “Тадбиркор аёл: ватанимиз равнақига ўз ҳиссамизни қўшамиз” савдо кўргазмаси ва тадбиркорлик кунларида ташаккурнома, “Атлас байрами” миллий матолар фестивалида сертификат, “HAND MADE.UZ” миллий санъат фестивалида сертификат, Хитой Халқ Республикасининг Урумчи шаҳрида “Ипак йўли” III халқаро модалар фестивали ташкилий қўмитаси Ўзбекистон Республикасининг Самарқанд шаҳридаги “HIPPY BIRD” галериясининг “Шарқ йўллари” кийимлар коллекциясини ташкил этишдаги иштироки учун ташаккурнома билан тақдирланган.
2016 йилда “Арт фолк” Ўзбекистон санъат ва фолклори иштироки учун диплом, “Атлас байрами” миллий матолар фистивалида фахрий ёрлиқ,
XV анъанавий “Ипак ва зираворлар” кўргазмасида 1-ўринни эгаллаган.
2017 йилда Марғилон шаҳрида ўтказилган “Атлас байрами” миллий матолар фестивалида 1-ўринни эгаллаган.
Натижада 2015 йилда 18 турдаги 216 дона, 2016 йилда 25 турдаги
300 дона, 2017 йилда 31 турдаги 356 дона, жами 181 миллион 688 минг сўмлик каштачилик маҳсулотлари тайёрлаб, 36 миллион сўм соф фойда олган.
М.Хамдамова 2010 йилда ўз уйида устоз-шогирд мактабини очган. Унда 20 дан ортиқ ёшларга сўзаначилик сирларини ўргатиб келмоқда. 2012 йил Самарқанд шаҳар Тошкент кўчасида очилган ҳунармандлар марказида ҳар йили 10 дан ортиқ ёшларга устозлик қилмоқда.
Жамоат ишларида фаол. Фидойилиги, жонкуярлиги билан ҳамкасблари, вилоят ҳунармандлари ўртасида ҳурмат қозонган.
М.Хамдамова оилали, тўрт фарзанднинг онаси.
