Махсус имкониятлар
Мамлакатимизда тадбиркорлик фаолиятининг тўсқинликсиз амалга оширилишини таъминлаш, бизнес юритиш учун қулай шарт-шароитлар яратиш ва республиканинг инвестициявий жозибадорлигини оширишга қаратилган кенг кўламли ислоҳотлар олиб борилмоқда.
Президентнинг 2018 йил 27 июлдаги “Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида»ги 5490-сонли Фармони мазкур соҳадаги бюрократик тўсиқларни бартараф этиш, тадбиркорлик субъектларини ҳимоя қилишнинг ҳуқуқий механизмларини янада кучайтириш, ишбилармонлик муҳитини яхшилаш ҳамда тадбиркорлар учун кенг имкониятлар яратишда яна бир муҳим қадам бўлди.
Фармонга мувофиқ қарздорлиги ўчирилаётган юқорида назарда тутилган шахслар 2019 йил 1 январга қадар муддатда тадбиркорлик фаолиятини тиклаган ёки қонун ҳужжатларида белгиланган тартибда давлат рўйхатидан ўтган ҳоллардагина улар учун амал қилиши белгилаб қўйилган. Яъни тадбиркорлик фаолиятига яна қайта кириб, интизомли фаолият юритишни истаган якка тартибдаги тадбиркорларга фармон асосида имтиёзлар берилмоқда.
Президентнинг фармони асосида якка тартибдаги тадбиркорлар сифатида давлат рўйхатидан ўтмасдан фаолият олиб бораётган жисмоний шахслардан тегишли фаолият тури бўйича ўрнатилган ставкадан келиб чиқиб ҳисобланган бир йиллик миқдордаги қатъий белгиланган солиқни бир йўла ундириш тартиби ҳам бекор қилинмоқда.
Туманда 1200 тага яқин қарздорлиги кечилиши мумкин бўлган тадбиркорлар мавжудлиги аниқланган. 2018 йил ноябрь ойи сўнгги ҳолатига қадар 81 нафар фуқаро давлат рўйхатидан ўтиб тадбиркорлигини тиклаганлиги сабабли уларнинг 1151582 минг сўмлик солиқ ва бошқа тўловлардан бўлган қарздорлиги кечилди.
Хулоса қилиб айтганда, Президентнинг ушбу фармони тадбиркорлик муҳитини янги босқичга кўтариш, тадбиркорларнинг ишончли ҳуқуқий ҳимоясини таъминлашда муҳим аҳамиятга эга.
Бахтиёр АҲАДОВ,
Хусан САНАЕВ,
туман Давлат солиқ инспекцияси ходимлари.
